Kryeministri në detyrë i Kosovës, Ramush Haradinaj i ftuar në emisionin “Pressing” ka folur lidhur me padinë që homologu shqiptar Edi Rama ka ngritur kundër tij.
Megjithatë Haradinaj nuk heq dorë nga e tija duke u shprehur se plani për ndarjen e Kosovës ka qënë i vërtetë.
“Edi Ramën e kam vëlla. I kam vëllezer e motra të gjithë shqiptarët. Por unë jam kundër ndarjes. Ky ka marrë pjesë në projektin e ndarjes. Ajo ndarja ka pasë me bë dëme në shtetësinë tonë. Pasi që të hapet Kosova e 17 shkurtit nuk ka më kthim pas,”-tha kryeministri.
Haradinaj tregon edhe për shumën e 10 miliardë euro që kishte thënë se do ndahej mes Ramës, Thaçit dhe Vuçiçit.
“Mbi 10 miliardë euro dëme do i bëheshin Kosovës në rezerva dhe minerale të Trepçës. Gjithsesi ai për momentin është në pushtet por nuk e ka të sigurt që do të qëndroj dhe mund ta humb atë. Shihemi në gjyqe,”- tregoi kryeministri në detyrë.
Reagimi i Haradinajt vjen pas deklaratës së Ramës, i cili mohoi që të kishte ndërhyrë në çështjen e Kosovës në Bruksel. Disa javë më parë, Haradinaj e akuzoi publikisht Ramën se kishte dijeni se Thaçi, Rama e Vuçiç do të ndanin 10 miliardë euro me njëri-tjetrin për copëtimin e Kosovës. Haradinaj akuzoi më tej Ramën, kur tha se i ka bërë presion në prani të Merkel e Macron për të hequr taksën vendosur ndaj mallrave serbe.