Shqipëria U-21 ka nisur përgatitjet për kualifikueset e Kampionatit Europian 2025 dhe trajneri i kuqezinjve, Alban Bushi ka zbardhur edhe listën me emrat e 23 lojtarëve që do të grumbullohen për dy sfidat e para të turneut.
Kombëtarja U-21 luan duelin debutues në transfertë ndaj Armenisë më datë 8 shtator (ora 17:00, City Stadium-Abovyan), ndërsa më 12 shtator do të presë Rumaninë më takimin që luhet në stadiumin “Elbasan Arena”, duke filluar në ora 18:30. Përpara ndeshjeve, për mediet foli trajneri i Shpresave. Alban Bushi tregoi për lojtarët e rinj që kanë shanse të tregojnë veten dhe të jenë si Ramadani apo Broja.
“Futbolli ndryshon shpejt, kemi pasur lojtarë që nuk do t’i thërrsnim por kanë bërë mirë. Mjaki ka bërë mirë dhe do të na shërbejë. Buxhelajn e kishim planifikuar titullar, por nuk ka marrë shumë minuta dhe do ta shohim. Të gjithë ekipet e moshave punojnë për ekipin A, kemi edhe ne pretendimet tona për rezultate. Jemi të kënaqur që Bajrami dhe Simoni janë pjesë e jona për këto ndeshje. Enis Asani hera e parë që vjen nga Thuni, është shumë i mirë. Duhet të bëjmë mirë në këto ndeshje, Armenia është ekip i fortë në fushën e vetë. Nga ndeshja me Bullgarinë nuk kemi katër apo pesë lojtarë”, tha trajneri.