Aleatët e Partisë Demokratike i kanë kërkuar kreut të shtetit Ilir Meta të deklarojë shtyrjen me gjashtë muaj të zgjedhjeve lokale.
Të njohur si “Forumi për Zgjedhje të Lira” krerët e partive aleate të PD kanë qenë në Kamëz. “I kërkoj Presidentit të Republikës, si autoriteti kushtetues i vetëm i këtij vendi, i cili duhet të garantojë unitetin e popullit; i cili duhet të garantojë një shoqëri demokratike e pluraliste; i cili duhet të garantojë nga pikëpamja kushtetuese një shoqëri që bazohet mbi votën e lirë, të deklarojë shtyrjen e zgjedhjeve lokale me 6 muaj. Në qoftë se Presidenti i Republikës ka deklaruar që është i gatshëm, në qoftë se do të ketë mirëkuptim politik, ne sot kuptojmë që nuk ka mirëkuptim nga pushteti i krimit. Prandaj është e rëndësishme që të shtyjmë zgjedhjet për 6 muaj dhe të ndërtojmë një qeverisje tranzitore”, deklaroi kreu i PR, Fatmir Mediu.
Lidhur me audiopërgjimet e reja të publikuara nga gazeta gjermane “Bild”, aleatët e PD-së janë të mendimit se Vangjush Dako nuk mund të vidhte votat pa bekimin e Edi Ramës.
“E shihni, sot dhe përditë, që vazhdon të mbretërojë si një sulltan në të gjitha institucionet shqiptare. Ka kaluar në delir. Krye ‘skifteri’ është ky vet, i cili ka vjedhur zgjedhjet. Nuk kanë vjedhur persona të veçantë, apo kryetarë bashkish, ka qenë ky shefi i vjedhjeve. Nuk mund të vidhte Dako pa bekimin e këtij, i ka bekuar ky këta, por ç’është më e keqja, mirë se i ka bekuar për vjedhje, por këta njerëz i ka marrë dhe i ka çuar në pushtet”, tha kreu i PAA Agron Duka.
Krerët e partive opozitare kërkuan nga qytetarët që të vijojnë rezistencën dhe të marrin pjesë masivisht në protestën e 8 qershorit.