Gjatë fjalës së tij në mbledhjen e OKB-së që po mbahet në Nju Jork, Vasily Nebenzya tha se Amerika ka “hapur kutinë e Pandorës” dhe se askush nuk e di se çfarë katastrofash të reja do të sjellin zhvillimet e fundit.
“SHBA-të qartësisht nuk janë të interesuara për diplomaci,” shtoi ai, raporton Sky News.
Këshilli i Sigurimit i Kombeve të Bashkuara është mbledhur sot në një seancë të jashtëzakonshme, për të diskutuar përshkallëzimin e tensioneve mes Izraelit dhe Iranit, si dhe ndërhyrjen ushtarake të SHBA-së ndaj objekteve bërthamore iraniane.
Gjatë mbledhjes, ambasadori i Izraelit në OKB, Danny Danon, paralajmëroi se nëse Irani vazhdon të sulmojë qytetarë izraelitë, atëherë do të përballet me “një forcë të pandalshme dhe të drejtë”.
Danon deklaroi gjithashtu se shpreson për një të ardhme më të mirë për popullin iranian, duke theksuar se:
“Lutemi për një ndryshim për popullin iranian, por ky ndryshim duhet të vijë nga brenda vetë Iranit, jo nga Izraeli.”