Kreu i Federatës Shqiptare të Futbollit, Armand Duka i pranishëm në dëgjesën publike që po mban kryeministri Edi Rama në lidhje me bastet sportive, tha se në të gjithë botën luhen në mënyrë të ligjshme dhe për të, të ardhurat do të kalojnë për investime publike.
“Gjatë kësaj periudhe mbështetja nga ministria ka qenë shumë e mirë. Bastet sportive luhen në të gjithë botën. Nuk po kërkojmë një gjë që nuk ekziston. Ato që luhen le të luhen në mënyrë të ligjshme.
Në fund e çliron edhe ministrinë e Brendshme se nuk do merret, pasi do jetë e ligjshme. Duke përfituar nga ky takim që nuk është shumë i zakonshëm, do rikujtoj që sporti në përgjithësi, por edhe futbolli në veçanti, ka nevojë akoma më shumë sesa rikthimi i basteve.
Nëse do ta riktheni ligjin e basteve, ne do ti kalojmë për të ndërtuar fusha në Tiranë. Fatmirësisht duke qënë drejtues i Federatës, nuk kam nevojë që ta promovoj futbollin në Shqipëri. Unë nuk jam nga ato që besoj se plani dy-vjeçar do të na sjellë begati, kemi shumë punë për të bërë, të klubeve e ekipeve të futbollit, asnjë të mos ketë iluzione që mund të zhvillojë sportin pa mbështet qeveritare. Ne jemi i vetmi vend që nuk kemi një ligj që incentivon sponsorizimin në sport”.