Arrestimin e ish-kryebashkiakut Agim Kajmaku për trafik kokaine, deputetja demokrate, Orjola Pampuri, e konsideron si qershia mbi tortën e përvjetorit të Partisë Socialiste, duke ironizuar 31-vjetorin e krijimit të kësaj force politike.
Sipas saj, sot u vërtetua ajo që PD-ja denoncoi me fakte para dy vitesh.
“Agim Kajmaku , si qershia mbi tortën e festës së PS. Ajo që ne denoncuam me fakte para dy vitesh, për kryebashkiakun “shembull” të Edi Ramës, u vërtetua sot. Ai nuk ishte doktor shkencash, por trafikant droge paska qënë. Ashtu sikurse janë vërtetuar, gjithashtu po vërtetohen shumë afera korruptive, apo përfshirje në trafik kombëtar e ndërkombëtar droge, që PD ka denoncuar për njerëzit pranë Edi Ramës, të cilët e mbështetën për të qëndruar në pushtet. Shqiptarët duan ndryshim, duan figura të papërlyera, të pakorruptuara, me të cilët të përfaqësohen e ky vend të eci përpara”, shkruan Pampuri.
Ish-kryebashkiaku i Vorës, Agim Kajmaku, u arrestua në Grottamare, një qytezë në krahinën e Ascoli Piceno-s në Itali, nën dyshimet e trafikut të drogës. Kajmaku dhe nipi i tij u kapën, pasi rezulton të kenë fshehur pako me kokainë në disa vazo bimësh të blera në një fidanishte të zonës. Sipas policisë italiane bëhet fjalë për të paktën 20 kilogramë, vlera e të cilave kap afro 1 milion euro.