Italia ka miratuar një ligj të ri që ashpërson rregullat për personat me origjinë italiane që kërkojnë të pajisen me pasaportë italiane.
Sipas ndryshimeve të reja, të miratuara nga Parlamenti italian, aplikantët duhet të kenë të paktën një prind ose gjysh që ka qenë qytetar italian me lindje, për të përfituar nënshtetësinë.
Qeveria tha se ndryshimet synojnë të “forcojnë lidhjen” midis Italisë dhe qytetarëve jashtë vendit, të parandalojnë “abuzimin” dhe “komercializimin” e pasaportave italiane.
Sipas të dhënave zyrtare, nga fundi i vitit 2014 deri në fund të 2024-s, numri i qytetarëve italianë që jetojnë jashtë vendit është rritur me 40%, duke arritur nga 4.6 milionë në 6.4 milionë. Deri në fund të marsit 2025, kur qeveria e kryeministres Giorgia Meloni paraqiti ligjin, mbi 60,000 çështje gjyqësore për verifikimin e nënshtetësisë ishin ende në pritje.
Ministria e Jashtme italiane deklaroi se kjo reformë do të lejojë konsullatat të përqendrohen vetëm te ata që kanë një lidhje të vërtetë me Italinë. Ministri i Jashtëm Antonio Tajani theksoi se parimi i jus sanguinis nuk do të zhduket, por do të vendosen kufij të qartë për të shmangur keqpërdorimin e procesit.