Avokati Adriatik Lapaj tha se në sulmin e IKMT ndaj ambienteve të “Prestige Resort”, Edi Rama ka konsumuar vepër penale.
Lapaj, i ftuar në emisionin “Open” theksoi se Rama drekonte në resort, në një kohë, që vetë me firmën e tij si kryetar i KKT e cilësonte hotelin si “ndërtim pa leje”.
Sipas Lapajt, Rama ka konsomuar veprën penale të moskallëzimit të krimit, duke shtuar se ngjarja nxjerr dhe njëherë në dritë se pushteti vepron në bazë të interesave të veta dhe jo në interes të publikut.
“Pushteti në Shqipëri luan shumë me anën emocionale të njerëzve. Unë kam parë lejen e publikuar nga Ministria e Brendshme. Dua të theksoj se nuk jam njohur me dosjen, sepse nuk është e hapur për publikun. Në bindjen time ai që ka firmosur lejen, nuk ka firmosur leje për interesin publik. Por e kanë firmosur, po të njëjtët njerëz që kanë hedhur në mbeturina idenë që kanë pasur më herët.
Ne si qytetarë kuptojmë se pushteti, kur i prishet interesi, nis dhe të “shqetësohet” për rërën, për detin, ndërsa më herët nuk e bënte diçka të tillë. Kryeministri shihet në disa foto teksa drekon në një “vend krimi” sipas tij, sepse ka pasur interesat e tij dhe kur i është prishur interesi, ka vepruar ndryshe. Rama ka konsumuar vepër penale, atë të moskallëzimit të krimit. Kjo sepse kryeministri ka qenë në dijeni të lejes, sepse e ka firmosur vetë si kryetar të KKT-së. Kur ka qenë në resort, do të duhej të bënte kallëzim duke qenë se e cilësonte “ndërtim pa leje”, gjë që nuk e ka bërë. Kjo sepse Rama aludon sot e na thotë se resorti, sipas tij, është “ndërtim pa leje”, deklaroi Lapaj.