Sekretari i Përgjithshëm i Partisë Demokratike, Gazment Bardhi është paraqitur sot në gjykatë për të dhënë dëshminë për çështjen “Babalja”. Ai tha se edhe pse ka kaluar një vit, asnjë rezultat nuk ka nga hetimet.
Bardhi tha se nuk ka marrë asnjë kërkesë për të shkuar forcërisht në gjykatë dhe se e ka marrë vesh nga mediat se duhet të paraqitet më 4 shtator në orën 12.00.
Ai tha për mediat se nuk e ka takuar asnjëherë Fredi Alizotin, teksa ky i fundit ka pretenduar të kundërtën. “Nuk pati asnjë përballje, zotëria pretendoj se rastësisht e kam takuar. E gënjeshtër. Unë atë zotëri e shikoja për herë të parë në sallën e gjyqit dhe nuk jam takuar kurrë me të. Ndryshe nga rasti i Albert Veliut i cili siç shpjegova jam takuar darkën e ditës kur ne kemi bërë denoncimin publik mbi përfshirjen në trafik droge të vëllait të ministrit të brendshëm të asaj kohe, zotit Fatmir Xhafa”, shpjegoi Bardhi.
Ai tha se çdo denoncim i bërë nga PD ka pasur përdorim politik nga prokuroria. “Çdo denoncim që ka bërë PD me përdorim politik nga prokuroria e kësaj çështje me qëllim të vetëm të mbrojtjes për vëllain e ish ministrit të brendshëm vijon sot e kësaj dite”, ka thënë ai.
Lidhur me hetimet per dosjen ne fjale kujtojme se Prokuroria e Tiranës ka marrë të pandehur ish-deputetin e Partisë Demokratike Ervin Salianji për akuzën e “kallëzimit të rremë”.
Në seancën e sotme ka qenë i pranishëm vetëm Fredi Alizoti pasi ish-deputeti Salianji dhe gazetari Jetmir Olldashi, gjithashtu i pandehur, mungonin.