Drejtuesi Politik i PS për qarkun e Fierit, Taulant Balla ishte i pranishëm në takimin e kryeministrit Edi Rama në Bashkinë Mallakastër, ku vuri theksin te angazhimi i qeverisë për të ndihmuar çdo fermer të zonës.
Në fjalën e tij, Balla tha se këtë vit “për shkak të prodhimit të lartë të vajit të ullirit jemi duke kërkuar për shitje në tregje ndërkombëtare”.
“Mallakastra është tokë e bekuar. Këtë vit prodhimi i ullirit dhe i vajit ka kaluar çdo parashikim dhe si me kryetarët e bashkive edhe me minstren Krifca jemi duke kërkuar tregje ndërkombëtar për certifikimin e prodhimeve tona, kategorizimin e tyre sipas llojit si dhe shitjen e prodhimit tonë.
Vaji vegjetal ka çmim më të lartë se ai i ullirit, kjo si rrjedhojë e prodhimit të lartë këtë vit, asnjë fermer s’po hedh prodhimin e tij siç pashë në një televizion të degraduar; përkundrazi jemi duke kërkuar për shitje në tregje ndërkombëtare. Ndaj nuk duhet të jemi patriotë vetëm kur luan kombëtarja, por duhet të jemi duke blerë shqip.”
Balla nuk hezitoi të ironizojë bashkëpunimin Berisha-Meta për zgjedhjet lokale të 14 majit.
“Mallakastër do të thotë ‘Kështjellë e vështirë’ dhe kjo luftë e vështirë do përballohet nga të gjithë në, bashkë. Falënderoj qytetarët e të cilët na kanë mbështetur deri tani dhe do të na mbështesin në zgjedhjet e 14 Majit. Ilir Metës dhe Sali Berishës, të cilët Mallakastra i ka provuar dhe s’ua ka parë asnjërit hajrin, aq më tepër tani në aleancën e tyre të cilën e mbështet Putin dhe këtë gjë e dinë të gjithë qytetarët e Mallakastrës. Ajo që na duhet të kemi edhe Bashkinë e Mallakastrës edhe Edi Ramen Kryeministër që të vazhdojmë punët e nisura”, përfundoi Balla.