Banorët e fshatrave të Derjanit e Macukullit u shprehën sot gjatë dëgjesave publike për hartimin e projekt-buxhetit dhe paketës fiskale të vitit 2022 se prej 70 vitesh ishin harruar nga të gjitha qeveritë. Mungesa e ujit të pijshëm, gjendja e rënduar e rrugëve rurale, mungesa e ujit për vaditje e kanë bërë jetesën në këto zona problematike.
Hajrulla Gjoni dhe Esat Xhetani thanë se aktualisht po punohet në çdo fshat të Matit dhe kjo i bën matjanët optimistë se gjendja do të ndryshojë. “Ky kujdes i munguar prej 70 vitesh ka bërë që shumë familje ta braktisin vendlindjen. Ndërsa dy vitet e fundit, pas zgjedhjes së kryetarit të bashkisë Agron Malaj, po punohet kudo, në ujësjellësin e 17 fshatrave, në kanalet ujitëse, në mirëmbajtjen e 420 kilometrave rrugë rurale. Administrata lokale nuk i trajton qytetarët si të majtë apo të djathtë, por të gjithë ndihen të vlerësuar.”
Ndërkohë ish kryetari i komunës Derjan Nazmi Çela theksoi se për 70 vjet derjanasit ishin të persekutuar, të lënë në harresë. “Në se investimet do të vazhdojnë me këto ritme ne do të mbështesim Agron Malajn”, tha Çela.
Kryetarët e fshatrave të Macukullit Nazmi Meta e Ismail Doçi thanë se dora e bashkisë është ndjerë në infrastrukturën e fshatit të largët. Ato vijuan me kërkesën e tyre që rruga Burgajet-Derjan-Macukull të asfaltohet. Në përgjigje të këtij shqetësimi kryetari i bashkisë u shpreh se është hartuar projekti i kësaj rruge të rëndësishme dhe ky investim po kërkohet me ngulm pranë institucioneve shtetërore dhe donatorëve.
