Banorë të Kamzës u shprehën sot se kryetari i Bashkisë Xhelal Mziu po i pengon të aplikojnë për t’u pajisur me karta identiteti. Në rrjetet sociale banorët i bëjnë thirrje drejtorit të Përgjithshëm të Gjendjeve Civile dhe Prokrurorisë të nisin menjëherë hetimet ndaj kryebashkiakut për këtë veprim antiligjor të tij. “Sot, thonë banorët e Kamzës, dhjetëra qytetarëve u është refuzuar aplikimi për karta. Preteksti është se ne duhet të paguajmë taksat e vitit të kaluar. Ky kryetar vijon makinacionet e një viti më parë, kur ai nuk lejonte lëshimin e certifikatave pa paguar detyrimet e vitit 2017. Prej tri ditësh banorët e Paskuqanit qëndrojnë në radhë për të aplikuar, por kthehen pa kryer këtë shërbim”.
Banorët që nuk arritën të aplikojnë për t’u pajisur me karta identiteti u kërkojnë banorëve të tjerë të Kamzës të ngrihen në protesta deri në zgjidhjen e këtij shqetësimi. Ata shprehen të revoltuar se është e disata herë që nëpërkëmben nga kryetari i bashkisë Xhelal Mziu.