Banorët e Lenies në bashkinë e Gramshit dolën në protestë. Kjo për shkak të gjendjes së amortizuar të rrugës e cila sipas tyre është bërë e pakalueshme. Për ta rruga është dëmtuar nga një kompani që po punon për ndërtimin e tre hidrocentraleve në zonën e Grabovës së Sipërme.
Këto hidrocentrale shfrytëzojnë ujin e të gjithë zonës, por banorët kanë kritikuar se kompania që po zhvillon këto projekte nuk ka bërë asnjë investim në infrastrukturën e zonës.
Një nga kërkesat kryesore të protestuesve është rikonstruksioni i rrugës, pasi ajo është dëmtuar ndjeshëm nga kamionët e kompanisë. Banorët thanë se protestën e radhës do ta zhvillojne para bashkisë së Gramshit, pasi nuk kanë mbrojtur interesat e tyre.