Urdhri i kontrolleve në kampin Ashraf-3 është në kuadër të luftës kundër terrorizmit dhe parandalimit të sulmeve kibernetike. Shumë nga banorët e kampit, ku strehohet opozita iraniane janë shoqëruar dhe janë marrë në pyetje dhe janë kthyer sërish. Rreth 3,000 anëtarë të MEK, e cilësuar si opozita iraniane në mërgim vlerësohet të jetojnë në Kampin Ashraf-3.
Avokati i muxhahedinëve, Genc Gjokutaj tha se është konfirmuar që një person 65 vjeç ka humbur jetën ditën e sotme. Ai tha se të paktën 50 persona të tjerë janë plagosur gjatë aksionit të policisë brenda kampit në zonën e Manzës. Anëtarja e MEK tha se janë sulmuar në Iran, por në Shqipëri priteshin të mbroheshin. Gjithashtu ajo theksoi se miku i saj i ngushtë mbeti i vrarë nga ky aksion i policisë.
Për herë të parë, muxhahedinët nisën të vijnë në Shqipëri në 2013-tën pas një marrëveshjeje me qeverinë e atëhershme shqiptare, të drejtuar nga Sali Berisha. Gjatë vitit që lamë pas shërbimet publike online dhe faqet qeveritare u mbyllën përkohësisht për shkak të sulmit kriminal kibernetik të sinkronizuar dhe të sofistikuar nga Irani.
