Lulzim Basha ka mbledhur ditën e sotme Këshillin Kombëtar të “Demokratëve Euroatlantikë”, ku ka miratuar 55 kandidatët e parë për zgjedhjet parlamentare të 11 Majit, edhe mbetet e paqartë se si do të futen në zgjedhje dhe në cilët qarqe do të kandidojnë.
Tek lista e publikuar nga vetë Basha në rrjetet sociale, vihen re se emrat që ka caktuar për kandidatë për deputetë janë pothuajse të gjithë ata që i kanë qëndruar në anën e tij, pas përplasjeve në Partinë Demokratike.
Mes emrave në listë janë ato të dy deputeteve Merita Bakiu dhe Oriola Pampuri, ish deputetëve Endri Hasa, Azgan Haklaj, Gazmend Koduzi, ish kreu i PD-së së Librazhdit Bujra Vreto, apo emrat e Shemsi Premçit, Rudi Erebarës, Neli Demi, Taulanda Jupi, etj.
“Ata janë produkt i një konsultimi të gjerë me qytetarët, njerëz me integritet dhe profesionistë të zotë, që jetojnë çdo ditë me shqetësimin e bashkëqytetarëve të tyre, që janë dëshmuar se qëndrojnë për vlerat dhe parimet jo për interesa të vogla personale. Ata, si dhe kandidatët e tjerë që do të marrin miratimin e këshillit në ditët në vijim, do të garojnë në listë të hapur dhe do të jeni ju që do të vendosni se kush do t’ju përfaqësojë në parlamentin ardhshëm.
Kandidatët tanë do të shpalosin, anembanë vendit, programin tonë reformues, që ka në qendër luftën e pakompromis ndaj korrupsionit, mirëqeverisjen, familjen dhe rininë e jashtëzakonshme shqiptare.” – shkruan Basha në postimin e tij.