Kreu i bashkisë së Shkodrës, Benet Beci i uroi mirëseardhjen Arqipeshkvit, Imzot Giovanni Peragine. Beci shprehu mirënjohjen dhe konsideratën për Monsinjor Angelo Massafra, i cili e konsolidoi arkidioqezën metropolitane Shkodër-Pult.
Imzot Giovani Peragine mori detyrën e Arqipeshkvit të Dioqezës Shkodër-Pult disa ditë më parë në një ceremoni pranë katedrales së Shkodrës, ku iu dorëzua detyra nga Monsinjor Angelo Massafra.
“Si në kohë të mira ashtu edhe në kohë të vështira për këtë vend, ai kontribuoi në forcimin e harmonisë ndërfetare që populli ynë e vlerëson thellësisht. Shkodra ka qenë gjithmonë një shembull i shkëlqyer i kësaj harmonie, dhe ne jemi të bindur se, nën drejtimin tuaj, kjo traditë do të vazhdojë të zhvillohet më tej. Jam i sigurt se do të kemi mundësi për një bashkëpunim të frytshëm në shërbim të së mirës së përbashkët, duke kontribuar për mirëqenien e qytetarëve dhe duke ndihmuar ata që kanë më shumë nevojë”, tha Beci.
Po ashtu kryebashkiaku e siguroi Arqipeshkvin, Imzot Giovanni Peragine për mbështetjen dhe angazhimin e vazhdueshëm të bashkisë Shkodër, ndaj institucioneve fetare të këtij qyteti.
