Deputeti i Partisë Demokratike, Belind Këlliçi, duke komentuar vendimin e Bullgarisë për të hequr veton ndaj Maqedonisë së Veriut, ai u shpreh se nuk e ka fajin Bullgaria për hapjen e negociatave për Shqipërinë, por qeverisja e Ramës.
“Nuk na e ka fajin Bullgaria që nuk hapen negociatat, e ka fajin Shqipëria, kjo qeverisje. E ka fajin shteti shqiptar që në çdo raport ndërkombëtar del shteti më i korruptuar i Europës. Në vend që të kemi një qeveri që reflekton, ti ke Edi Ramën që shqetësohet se ku I gjejnë paratë shqiptarët me 300 mijë lekë rrogë që edhe jetojnë edhe hanë bukë, dhe kanë lekë për të pushuar. E gjitha buron prej vizioni të Kryeministrit.”
I ftuar në studion e “Ora News”, ai u ndal edhe te protesta e thirrur nga Berisha, e që pritet të zhvillohet më 7 korrik. Këlliçi argumentoi se arsyeja kryesore e kësaj protestë është rritja e çmimeve.
“7 korriku është një provë zjarri. Është kërkesë e qytetarëve që kanë kërkuar me ngulm që PD ti rikthehet protestave serioze një orë e më parë. Duke parë situatën është vendosur që më datë 7 korrik në orën 19:00 do të organizojmë protestën e kombëtare. Arsyet janë të shumta: Vjedhja që po u bëhet shqiptarëve, kthimi i Shqipërisë në një shërbëtorë të devotshëm të Serbisë. Por arsyeja kryesore e protestës është rritja e çmimeve.”