Pas mbledhjes së Këshillit Kombëtar, ku u merr vendimi që kandidatët e Primareve të futen në zgjedhjet e 14 majit me koalicion, Sali Berisha ka bërë hapin e radhës.
Dy përfaqësuesit ligjor në KQZ do bëjnë tentativën për t’u regjistruar si subjekt në zgjedhjet e 14 majit.
Zyra e shtypit të PD sqaron se “Përfaqësuesit ligjor të Partisë Demokratike në KQZ, Ledio Nuraj dhe Franc Nuri pas pak do të depozitojnë dokumentacionin për regjistrimin e PD-së si subjekt zgjedhor në zgjedhjet lokale të datës 14.05.2023 në Komisionin Qendror të Zgjedhjeve”.
Ndërkohë të njëjtën gjë pritet të bëjë edhe kryetari i Grupit Parlamentar të PD, Enkelejd Alibeaj, i cili do të depozitojë kërkesën për regjistrimin e PD dhe në fund do të jetë kryetari i Komisionit Shtetëror të Zgjedhjeve Ilirian Celibashi i cili do të vendosë se cilën kërkesë do të pranojë.