Ish-kryeministri Sali Berisha ka treguar sonte se kreu i shërbimeve sekrete në SHBA ka parë dosjen e tij për shpalljen “non grata”.
I ftuar në emisionin “Të paekspozuarit”, Berisha tha se, pasi ka parë dosjen për politikanët e Ballkanit, për të (Berishën) ai nuk ka gjetur asnjë fakt.
“Ata kanë kërkuar pjesë të sovranitetit në territor. Por nuk kanë kërkuar kurrë të diktojnë se kush duhet të jetë ose jo në Parlament. Këto janë jashtë të gjitha…
Kushdo në këtë botë të paraqesë një fakt dhe unë marr çdo vendim. E di çfarë u ndodh atyre që kanë bërë këtë? Fakte kemi, por s’i themi. Ata që kanë parë dosjen thonë që s’ka fakte. Jo pak vetë e kanë parë dosjen. Nëse drejtori në detyrë i të gjitha shërbimeve sekrete të SHBA-së, thotë se unë kam parë dosjen për politikanët e Ballkanit dhe për filanin, pra për mua, nuk ka pasur, e për rrjedhojë thotë se ke shërbyer si agjent i George Soros në Ballkan. A mendon ti se ky njeri, së paku nëse kandidon Donald Trump, është kandidat për ministër i Jashtëm, do investonte në këtë mënyrë?”, tha Berisha.
Sipas tij, nëse ai nuk do të ishte përjashtuar nga PD, do të zhvillonte një “projekt” me reagime ndaj shpalljes ‘non grata’ nga SHBA-të”.
“Po e ripërsëris. Në rast se do ishte në rrafshin personal, në mënyrë absolute kjo nuk më intereson. Unë kisha një projekt të gjerë reagimi si politikan, si intelektual. Kjo më merr kohën mua tani. Do bëja transparencë. Sot janë rreth 40 publikime, nga një libër deri tek shkrimet në media. Ky është qëllimi im. Dua të bëj transparencë. Asnjë njeriu nuk i kam thënë të më heqin. Nëse lufton për dinjitetin tënd, nuk duhet të kërkosh ndihmë. Unë nuk mund të pranoj të diktojnë se kush është në Parlament. Po të përcaktosh kush do të hyjë ose jo në Parlament, kjo nuk mund të ndodhë”, tha Berisha.