Në konferencën e kësaj të marte, më 25 nëntor, kryedemokrati Sali Berisha ka sulmuar komisioneren për zgjerimin në Bashkimin Europian, Marta Kos, si dhe ambasadorin e BE-së në Tiranë, Silvio Gonzato.
Kjo për shkak të qëndrimeve që ata kanë mbajtur lidhur me rezultatin e zgjedhjeve parlamentare të 11 Majit, të cilat i kanë konsideruar si legjitime.
Berisha tha se komisionerja Kos është frymëzuar nga propaganda e kryeministrit Edi Rama dhe se qëndrimi i saj shkel ligjin ndërkombëtar të vlerësimit të zgjedhjeve.
“PD pas deklaratës së zonjës Marta Kos bëri një deklaratë të cilën ajo e dënoi publikisht dhe gjerësisht, deklaratën e frymëzuar të zonjës Kos nga propaganda e paguar e Edi Ramës, ekstremizmi politik i majtë, si një deklaratë që shkel rëndë ligjin ndërkombëtar të vlerësimit të zgjedhjeve dhe ligjin kombëtar.
Ajo që lexova është se ka pasur një reagim nga ana e zëdhënësit të KIE, i cili shpreh qëndrimin e KIE-së të papajtueshëm me qëndrimin e Marta Kos, një adhuruese pa kushte e Edi Ramës dhe bëmave e gjëmave të tij. Falenderoj Komisionin për reagimin dhe garantoj se PD mbetet e përkushtuar si e ardhmja më e shkëlqyer për shqiptarët,” u përgjigj Berisha pas një pyetje të drejtuar ndaj tij nga gazetarët lidhur me qëndrimin e Kos për zgjedhjet.
Por Berisha këtu përmendi edhe ambasadorin e BE-së Silvio Gonzaton, për të cilin gjithashtu tha se është përçues i propagandës së kryeministrit Edi Rama në Bruksel.
“Opozita ndodhet para disa sulmeve të targetuara të individëve të caktuara që përfaqësojnë ose janë në Shqipëri e përfaqësojnë BE-në. Të ngjashme, por jo identike me Kos, janë qëndrimet e Gonzato që është përçues i propagandës së paguar të Edi Ramës dhe dezinformimit.
Ju kam informuar se ky zotëri, për të përçuar propagandën e Edi Ramës, u thotë atyre në BE që kryetari i PD nuk është perëndimor. Ky është mashtrim,” tha Berisha.