Një trëndafil i bardhë dhe mbishkrimi “Françesku” në latinisht. Ky është varri i Papa Françeskut në bazilikën Santa Maria Maggiore në Romë, ku ati i shenjtë do të prehet përjetësisht.
Tashmë besimtarët katolikë kanë filluar vizitat në varrin e Bergolios, pasi atij iu dha lamtumira ditën e shtunë, në një ceremoni ku morën pjesë rreth 400 mijë besimtarë dhe liderët botërorë.
Besimtarët që vizitojnë varrin formuan një radhë të gjatë dhe shprehën falënderimet e tyre për shërbimin e Françeskut në krye të kishës katolike.
Varri u hap në ditën e dytë nga nëntë ditët e zisë zyrtare për Françeskun, pas së cilës do të mbahet një konklavë për të zgjedhur Papën e ardhshëm. Papa Françesku zgjodhi vendin e varrimit të tij në Bazilikën e Shën Marisë së Madhe, pranë një ikone të Madonës që ai e nderonte, sepse ajo pasqyron jetën e tij të përulur dhe të thjeshtë.
Ndërkohë, një Meshë e veçantë u mbajt në Sheshin e Shën Pjetrit, e udhëhequr nga Kardinali Pietro Parolin, sekretari i shtetit i Vatikanit. Parolin konsiderohet një kandidat i mundshëm për t’u bërë Papa i ardhshëm për shkak të rëndësisë së tij në hierarkinë katolike.
Ende nuk është caktuar një datë për konklavën, por ajo duhet të fillojë deri më 10 maj. Kardinalët që udhëtuan në Romë për funeralin e Françeskut do të takohen rregullisht para konklavës, për të diskutuar drejtimin që duhet të marrë kisha katolike pas Bergolios, një Papë liberal që reformoi Vatikanin.