Themeluesi i Microsoft, Bill Gates, ka deklaruar se pjesa më e madhe e pasurisë së tij prej 200 miliardë dollarësh do të investohet në përmirësimin e shërbimeve shëndetësore dhe arsimore në Afrikë përgjatë dy dekadave të ardhshme.
Gjatë një vizite në Addis Ababa, kryeqytetin e Etiopisë, Gates theksoi rëndësinë e investimeve në kapitalin njerëzor si rruga më e sigurt drejt zhvillimit të kontinentit:
“Duke çliruar potencialin njerëzor përmes shëndetit dhe arsimit, çdo vend në Afrikë duhet të jetë në rrugën e prosperitetit”.
Ai u bëri gjithashtu thirrje inovatorëve të rinj afrikanë që të angazhohen në zhvillimin e Inteligjencës Artificiale (IA) për të ndihmuar në përmirësimin e kujdesit shëndetësor në kontinent, duke e konsideruar teknologjinë si një mjet të fuqishëm për ndryshim.
Bill Gates kishte njoftuar muajin e kaluar se 99% e pasurisë së tij do të dhurohet deri në vitin 2045, kur Fondacioni Bill & Melinda Gates pritet të përmbyllë aktivitetin e tij. Kjo iniciativë përbën një nga përpjekjet më të mëdha filantropike në histori, me fokus të veçantë në ndihmën për komunitetet më të pafavorizuara të botës.