Një unazë me vlerë 750 mijë euro, që u zhduk nga hotel Ritz në Paris u gjet në një fshesë me korrent. Pronarja, një biznesmene nga Malajzia e cila kishte qëndruar në hotel, bëri kallëzim në polici të premten, pas dyshimeve se ia kishte vjedhur një nga punonjësit.
Por sipas asaj që raporton Le Parisien, punonjësit e sigurisë së hotelit në fjalë e gjetën unazën e çmuar mes pluhurit të qeses së fshesës me korrent të dielën. Biznesmenja u largua drejt Londrës së premten, por mësohet se nuk do të kthehet në Paris për të marrë unazën. Hoteli Ritz, sipas medias franceze, i ofroi asaj 3 netë të tjera falas për shqetësimin e krijuar, ofertë që siç duket u refuzua nga klientja.
Biznesmenja i tha policisë se e kishte lënë unazën në tavolinën në dhomën e saj të hotelit të premten dhe kishte shkruar për të bërë pazar në qytete për disa orë. Kur ishte kthyer nuk e kishte gjetur më.
Unaza është marrë në ruajtje nga policie derisa e zonja e saj të shkojë për ta marrë.
Kjo nuk është hera e parë që raportohet për bizhuteri të zhdukura në këtë hotel. Në 2018-n, 5 persona të armatosur grabitën një argjendari që ndodhet brenda tij. Vlera e sendeve të marra shkonte mbi 4 milionë euro. Vitin e shkuar, një anëtare e familjes mbretërore saudite raportoi grabitjen e bizhuterive me vlerë mijëra paund në një nga dhomat luksoze të hotelit.