PD ka reaguar ashpër pas vendimit të Gjykatës së Lartë për të mos liruar nga burgu ish-deputetin Ervin Salianji. Nënkryetari i PD, Luçiano Boçi e cilësoi një akt të pastër përdorimi politik të drejtësisë nga qeveria. Boçi akuzoi Ramën dhe Fatmir Xhafajn për ndikim në sistemin gjyqësor. Kjo duke e quajtur vendimin shembull të qartë të përndjekjes politike ndaj opozitës.
”Gjykata e Lartë mori vendim për të vazhduar me shtrembërimin e drejtësisë dhe përdorjen politike të saj, duke lënë në burg Ervin Salianji. Deputeti i PD që prej tetorit të vitit të kaluar ndodhet në burgun e Fierit. Me një urdhër politik të zbatuar dhe të mbajtur sot në fuqi nga drejtësia politike e dyshes Rama-Xhafaj. Rama nuk heq dorë nga paranoja për të kontrolluar sistemin e drejtësisë dhe për të goditur me të kundërshtarët politikë.
Salianji është një prej tre të burgosurve politikë të opozitës, që mbahen peng nga partia-shtet, që kërkon përjetësimin narkoshtetit përmes mashës së drejtësisë. Ai është politikani i ri që u burgos sepse ngriti zërin. Kjo kur pa njerëzit e pushtetit të ngriheshin kundër Shqipërisë duke i kanabizuar territorin. Më 11 maj përgjigjia do të jetë e qartë dhe plebishitare si për urdhëruesit ashtu dhe shërbëtorët e kësaj pengmarrjeje politike me gjykatë.
Programi elektoral i Ramës është pikërisht ky. Mbro sistemin e kanabizimit dhe narkotrafikut të Shqipërisë, dhe dëno denoncuesit e tij. Rama do të jetë i pari me një përgjigje për të dhënë kur drejtësia të mbrojë shtetin, jo pushtetin”.