Deputeti i Partisë Socialiste, Erion Braçe, ka ngritur zërin për atë që ai e cilëson si një grabitje të hapësirave publike në Njësinë 5 të Tiranës. Në një video denoncuese, ai akuzon se tokat publike pranë Fakultetit Juridik po shpallen si prona private nga biznese parkimesh dhe individë të ndryshëm.
Sipas Braçes, situata është alarmante dhe përfshin jo vetëm biznese, por edhe individë të mbështetur nga një sistem që, sipas tij, përfshin zyrtarë të pronave, gjykatat dhe hipotekat. Ai kërkon një hetim të thelluar, nga zona e ish-kinemasë Agimi deri tek Garda e Republikës, për të zbuluar se si është bërë “grabitja e pronës publike”.
Në një status të fortë në rrjetet sociale, ai shkruan:
“Ditë-natë do të mbroj hapsirën publike në njwsinë time-5-sën.
Këtu, mes pallateve pas Fakultetit Juridik, babëzia e biznesit të parkimeve ka mbërritur. Njërën e kanë marrë biznesmenët e thonë ‘e kemi pronë’, tjetrën dy gra të moshuara e të forta, thonë ‘e kemi pronë’.
Kjo pas meje me një shkrim në krye ‘Gjelbërimi është jetë’, është bërë gati!
Nëse ka një krim që i ka të gjitha brenda- zyrtarë, hipoteka, gjykata-është ky. E kam thirrje apo britmë publike: Nga pallatet Agimi e deri tek zona e Gardës hetoni si është grabitur prona publike!
Mua do më keni në krah për t’i shkuar deri në fund e për t’ua kthyer banorëve hapësirën publike”