Në zonën e quajtur ‘Folea e Shqiponjës’, në Brezovicë të Kosovës është shkëputur një ortek bore duke zënë dy persona.
Federata Skitare e Kosovës njofton se njëri nga personat ka ndërruar jetë, ndërsa personi tjetër është në gjendje të rëndë shëndetësore.
Sipas drejtorit të Agjencisë për Mbrojtjen e Mjedisit, Ilir Morina viktima është djali i ish-kryetarit të Kuvendit të Kosovës, Nexhat Daci.
“Mbikëqyrësi i qendrës që i ka angazhuar agjencia, ka shpëtuar një person, duke e nxjerr në çastet e fundit të jetës. Ndërsa, personi i tjetër ka vdekur, që mendohet se është djali i Nexhat Dacit, Arian Daci”, tha Morina.
Arian Daci ishte emëruar Zëvendësministër në Qeverinë e Kosovës. Mësohet se në Brezovicë, familja Daci ka një vilë.
Kujtojmë që Brezovica është një ndër pikat turistike më të vizituara nga turistët gjatë dimrit, prandaj këshillohet të bërit kujdes.