Ngjarja më e rëndë e zgjedhjeve të 30 qershorit ndodhi në fshatin Bushkash të njësisë administrative Ulëz. Mesnatën e 29 qershorit persona ende të paidentifikuar sulmuan me lëndë plasëse qendrën e votimit e cila ndodhej në shkollën 9 vjeçare të fshatit.
Ngjarja u mbajt e izoluar nga të gjithë. Policia nuk dha detaje. Efektivët mbërritën shpejt në vendin e shpërthimit të fuqishëm por nuk shoqëruan, ndaluan apo arrestuan ndokënd. I gjithë fshati u zgjua pas eksplozionit dhe mbërriti në oborrin e shkollës, madje shprehën indinjatë për ngjarjen e pazakontë.
Jeta e punonjësit të Policisë Mat që ishte caktuar me shërbim për të ruajtur materialet zgjedhore u vu në rrezik. Copa gurësh, metalesh e drurësh dolën deri në oborrin e ndërtesës.
Megjithëse në këtë zonë ka persona kontigjentë policie, askush nuk u thirr apo u pyet për krimin e ndodhur. Pra ngjarja nuk ka ende autorë. /tirananews.al/