Drejtoresha e Komisionit Europian Genoveva Ruiz Calavera është takuar me përfaqësues të opozitës në vendin tonë.
Në një postim në Twitter të misionit të BE-së në Tiranë, mësohet se Calavera Ruiz u ka thënë opozitarëve se tashmë është koha që palët të vijnë së bashku për të mirën e vendit.
Një takim i tillë vjen në një situatë të tensionuar politike, ku opozita vijon me protestat, teksa ka djegur mandatet, ndërsa maxhoranca tenton të vijojë punën me deputetët e rinj opozitarë që po i shtohen dita-ditës Kuvendit.
“Është koha që të dy palët politike të vijnë së bashku për të mirën e përgjithshme të vendit”. Drejtoresha e Komisionit Europian Genoveva Ruiz Calavera u takua me përfaqësuesin e partive të opozitës për të shkëmbyer pikëpamjet mbi situatën politike në Shqipëri përpara Raportit Vjetor të Komisionit të 2019-ës”, thuhet në postimin në Twitter të misionit të BE-së në Tiranë.
Në foto shihet se Cavalera nuk është takuar as me Lulzim Bashën dhe as me Monika Kryemadhin, por me ish deputetët Aldo Bumçi, Oerd Bylykbashi, Klajda Gjosha dhe Silva Caka.