Futbollisti i Dinamos së Zagrebit, Lirim Kastrati nuk do të jetë në ndeshjen e parë të “play-offit” të Champions League ku skuadra kroate do të udhëtojë në Moldavi për tu përballur me Sheriff Tiraspol. Nuk bëhet fjalë për ndonjë dëmtim apo skualifikim të lojtarit, por për një skandal.
Lojtarit i është mohuar viza hyrëse nga Moldavia dhe nuk mund të luajë ndeshjen e parë kjo për arsye se shteti moldav nuk e njeh pavarësinë e Kosovës.Ka qene vetë Dinamo Zagreb që ka bërë të ditur se si është situata aktuale me lojtarin dhe se ky i fundit nuk udhëtonte dot për sfidën e rëndësishme, pavarësisht përpjekjeve për ta bërë një gjë të tillë.
Duhet kujtuar se në shtatorin e vitit të kaluar, Moldavia priti ndeshjen e Ligës së Kombeve ndaj Kosovës në Itali, pikërisht për faktin se nuk mund të garantonte udhëtimin e “Dardanëve” drejt vendit të saj për të njëjtën arsye.