Deputeti i PD-së, Kreshnik Çollaku thotë se janë në situatë tepër të vështirë pas humbjes së zgjedhjeve parlamentare të 11 Majit. Për të pas ekspozimit të farsës elektorale, është jetike për fatin e opozitës dhe shoqërisë shqiptare që të fillojë një debat i shëndetshëm. Do të shkojë opozita në Parlament dhe të fillojnë jetën normale? Deputeti nënvizon se nëse ndodh kjo, i bie që beteja për farsën elektorale kthehet në vetvete një farsë.
”Nëse do të shkojnë në Parlament, teza e farsës bie. Nuk do të isha për një refuzim të mandateve, por bllokim të mandateve. Pra do t’i kërkoja të shkojnë vetëm 8 herë në Kuvend. Të shkojnë ditën e parë, të marrin mandatin, të shkojnë pas 6 muajsh që të mos e djegin dhe të paraqiten çdo 6 muaj për të mos e djegur mandatin. Mendoj që është e vetmja gjë proporcionale me situatën”,-tha në ”A2cnn”. Sipas Çollakut situata e krijuar nuk ia bën të lehtë punën kryetarit të PD.
”Zoti Berisha është në vështirësi të madhe me situatën që është krijuar. Është thuajse aktori i vetëm, prodhuesi i një kontingjenti jo të vogël votash që mori PD, rreth 500 mijë vota. Mendoj që ai më shumë se çdo tjetër po vuan konfliktet e brendshme në PD, ku partia mbeti e përçarë, sidomos në bazë.
Berisha është në mes të këtij ngërçi, midis njerëzve që nuk kanë synim as dashurinë për Berishën, por karrierat e tyre, rrogat parlamentare, përfituan në mënyrë brilante nga kjo tollovi, dhe sot nuk janë të interesuar për të vazhduar status quo-në. Është jetike që këto procese të ndodhin. Ka nevojë të ulemi, në Kuvend apo Foltore, në mënyrë urgjente të ndërrojmë status quo-në e PD. Dhe këtu ka rol zoti Berisha.
Ka pasur momente që më është dukur se i vetmi që ka dashur bashkimin e demokratëve. Këta që thonë të iki Berisha, nuk janë të sinqertë. Nuk e di si do e zgjidhi statutin. Por Berisha si faktor politik, është vendimtar. Një njeri që mbledh i vetmi 400-500 mijë vota, nuk mund t’i thuhet “ik ti se do të vijmë ne”. Por vetëm me këto vota nuk vihet në pushtet. Duhen edhe një herë kaq”.