Për deputetin demokrat Kreshnik Çollaku, PD dhe PL nuk duhet të garojnë me lista të përbashkëta zgjedhore. Për të Ilir Meta nuk duhet të jetë në listën e sigurt të PD-së. Por sekretari i përgjithshëm i PD, Flamur Noka dje tha se Meta do të jetë në listën e sigurtë. Mesa duket grupi i PD-së do të përçahet sërish për emrin në listën jeshile për deputet.
”Mendoj se Ilir Meta pavarësisht se në gjendjen në të cilën ai ndodhet, pavarësisht burgosjes, pavarësisht goditjes totalisht të paligjshme e të padenjë, unë mendoj që PD dhe PL janë dy parti të ndara, kanë dy elektorate të ndarë, kanë dy qasje të ndara dhe kanë dy qëndrime të ndara. Unë do të isha në favor të tolerimit dhe të akomodimit në listat e PD të aleatëve historikë të djathtë që na bashkojnë programet politike.
I uroj shumë sukses Metës në betejën e tij ligjore, i uroj shumë sukses PL në garën elektorale, por unë mendoj që ne jemi dy parti të ndara dhe futja në lista të përbashkëta nuk ka prodhuar në asnjë rast histori suksesi. Ka bërë që vota të majta të mos votojnë për PD-në dhe vota të djathta të mos votojnë për listën e PD kur kanë parë që aty ndodhet një parti e majtë”, tha Çollaku në ”A2cnn”.