Pas dy vjetësh kontroll të republikanëve të Shtëpisë së Bardhë, Senatit dhe Dhomës së Përfaqësuesve, është radha e demokratëve që të menaxhojnë këtë të fundit. Në muajin nëntor u mbajtën zgjedhjet për Kongresin, ku demokratët siguruan 235 vende në Dhomën e Përfaqësuesve nga 435 vende.
Republikanët morën dy vende më shumë në Senat dhe aktualisht gëzojnë një shumicë prej 53 vendesh në raport me demokratët që kanë 47. Ligjvënësja Nancy Pelosi pritet të votohet si kryetare e Dhomës së Përfaqësuesve, post të cilin ajo e ka mbajtur nga viti 2007 deri në 2011. Kongresi i ri është është më i larmishmi për nga përbërja në historinë e vendit.
Ai përfshin ligjvënësen Alexandria Ocasio-Cortez nga Nju Jorkut, gruaja më e re e zgjedhur ndonjëherë në historinë e Kongresit. Po kështu Rashida Tlaib e Miçiganit dhe Ilhan Omar e Minesotës, janë dy gratë e para të besimit mysliman të zgjedhura për një vend në Kongres.
Në total, gratë mbajnë 102 vende në Dhomën e Përfaqësuesve dhe 25 vende në Senat. Kongresi i ri përballet me sfidën e menjëhershme të trajtimit të çështjes së mbylljes së pjesshme të qeverisë.
Deri tani ka pak gjasa që udhëheqësit demokratë të Dhomës së Përfaqësuesve dhe ata republikanë të Senatit, të bien dakord për një plan shpenzimesh që do të rihapte një të katërtën e shërbimeve qeveritare që aktualisht janë të mbyllura.