Ministrja e Bujqësisë dhe Zhvillimit Rural, Anila Denaj priti në një takim të veçantë, profesor Hubert Hasenauer, ish-rektor i Universitetit BOKU të Vjenës, rektorin e Universitetit Bujqësor të Tiranës Fatbardh Sallaku dhe rreth 50 studentë të UBT-së.
Denaj tha se gjatë këtij takimi u bisedua mbi ecurinë e projektit UBT-BOKU 2030 që synon të fuqizojë arsimin dhe kërkimin shkencor në bujqësi.
Ministrja vuri në dukje se me modernizimin e arsimit bujqësor, ky partneritet ndërkombëtar sjell më shumë mundësi për rreth 6000 studentë për përgatitjen e profesionistëve të ardhshëm të sektorit.
”UBT, tashmë në rrugën drejt një Qendre Ekselence Rajonale, do të ofrojë diploma të dyfishta dhe programe të reja akademike me standarde si Universiteti BOKU i Vjenës”, tha Denaj.