Ish-kryetari i Gjykatës Kushtetuese, Bashkim Dedja, është dënuar me 6 muaj burg, dënim i cili do t’i konvertohet në 1 vit shërbim prove.
Ky vendim është marrë ditën e sotme nga Gjykata e Posaçme kundër Korrupsionit dhe Krimit të Organizuar.
Prokuroria e Posaçme kërkoi 1 vit burg për Bashkim Dedjan, por Gjykata e Posaçme dha dënimin me 6 muaj.
SPAK-u pretendon se Dedja ka fshehur në deklarimin e tij një apartament me sipërfaqe 60 m2, e ndodhur në zonën Kryemedhenj, Njësia Administrative Golem Kavajë.
Ai akuzohet për kryerjen e veprës penale “Refuzimi për deklarimin, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, kryer në formën e deklarimit të rremë dhe të fshehjes, të parashikuar nga neni 257/a/2 i Kodit Penal.