Plarent Ndreca, deputet i Partisë Socialiste por tashmë dhe kandidat për këtë parti në listë të hapur, tha në Euronews Albania se në vija të përgjithshme palët politike, kryesisht dy forcat më të madha PS dhe PD, duhet të ndryshojnë. Sipas Ndrecës, nevojën më të madhe për rinovim e ka më së shumti Partia Demokratike.
“Të dyja palët politike duhet të ndryshojnë. Ata që marrin pushtetin do të thotë që janë të suksesshëm dhe se kanë kaq të nevojshme për të ndryshuar pasi kanë ardhur me ekip fitues. Kemi kuptuar që për shkak të faktit që kemi një opozitë të dobët, është e nevojshme të gjenden instrumenta që janë atipik për të arritur në një mënyrë rinovimi që nuk mund realizohet nëpërmjet organizimit partiak. Instrumentat atipik flas për listat zgjedhore, pra të fusësh një të ri, emra të padëgjuar në listat e mbyllura që ai të ketë mundsinë për një përfaqësim në Kuvend që nga pikpamja organizative se kishte marrë dot”, tha Ndreca.
Më tej, deputeti ka shpjeguar se çfarë mënyre ka zgjedhur PS për listat e hapura dhe të mbyllura të kandidatëve në zgjedhjet e 11 majit.
“Ne kemi zgjedhur ndryshe nga PD, që të rinjtë ti fusim në listë të mbyllur që ta bëjmë në mënyrë atipike, të bëjmë në mënyrë të sforcuar rinovimin e listave të PS. Ndërkohë që të vjetrit, pra atyre që kanë eksperiencë organizative dhe politike, ta provojnë secili forcën e tyre politike në listë të hapur, ta provojnë veten në garë dhe kjo besoj është mënyra më e mirë”, shtoi Plarent Ndreca.