Gjyqtarët kërkojnë që të dalin në pension 75 vjec, element ky që sipas tyre do të ndihmojë në uljen e stokut të dosjeve që presin për gjykim. Deputeti i PS-së, Fatmir Xhafaj tha se ky është problemi më i madh i drejtësisë sot, dhe shfaqi rezerva për disa ndryshime që mazhoranca kërkon tu bëjë ligjeve të reformës, për arsye teknike.
Në mungesë të opozitës, komisionet parlamentare vijuan punën, përfshirë dhe prezantimin e dy nismave ligjore që prekin për herë të parë dy ligje bazë të reformës në drejtësi. Edhe pse propozimet e socialistëve kanë natyrë teknike, ato hapën debate në Komisionin për Mbikëqyrjen Institucionale të drejtuar nga Fatmir Xhafaj, ku pyetja kryesore është: a i japin këto ndërhyrje zgjidhje problemit më të madh që është numri i lartë i dosjeve që presin gjykimin?
“Nga Unioni i Gjyqtarëve na ka ardhur një propozim që mosha e pensionit për magjistratët të shtyhet në 75 vjeç. Për fat të keq, kjo çështje ka shkuar ne emergjencë”, tha Olsi Komici. “Nuk ka problem më të madh se ky, por a e zgjidhin këto ndërhyrje ligjore?”, tha Fatmir Xhafaj. Po ashtu Xhafaj i cili udhëhoqi 10 vjet më parë reformën në drejtësi, është kritik ndaj një ndërhyrjeje pa një analizë të plotë, edhe pse kjo bëhet për të plotësuar kushtet e Bashkimit Evropian. “Çfarë ka ndodhur? KLGJ dhe KLP nuk kanë bërë punën e tyre dhe ne ndërhyjmë për një zgjidhje përjashtuese për krerët e gjykatave dhe prokurorive. Po sikur të ndodhë prapë në të ardhmen kështu?”, tha Fatmir Xhafaj.
Duhet një analizë e thellë e këtij 10 vjeçari, që të mos bëjmë ndryshime të ndryshimeve, është e dëmshme. “Vendosim filtra të fortë për pasurinë, dhe lidhjet e anëtarëve jo magjistratë në KLGJ e KLP”, Olsi Komici. “Ne i futëm aty anëtarët nga avokatia, akademia apo shoqëria civile që të sjellin më afër interesin qytetar. A e zgjidh kjo ndërhyrje këtë? E garanton profesionalizimin?”, tha Xhafaj.