Eja në Dibër! I tillë është apeli i deputetes së Qarkut Dibër, Almira Xhembulla. Në postimin e saj thuhet se ujërat termale të Peshkopisë kanë shëruar mijëra pacientë nga Shqipëria dhe vendet fqinje. Ajo shkon më tej kur përmend sëmundjet që kurohen nga këto ujëra. Edhe më herët Xhembulla i ka mbështetur subjektet private që ushtrojnë aktivitetin e tyre në llixhat e Dibrës.
Postimi i plotë:
Dibra ka një pasuri të paçmuar, prej së cilës përfitojnë jo vetëm banorët e zonës, por vizitorë nga e gjithë Shqipëria, Kosova, Maqedonia e Veriut e më gjerë.
Janë më mijëra pacientë që kanë gjetur shërim në ujërat termale të Peshkopisë.
Llixhat e këtij qyteti janë nga më të rrallat në botë për nivelin kurativ që kanë. Problemet me gjymtyrët, mëlçinë e zezë, guri në tëmth, sëmundjet e organeve të frymëmarrjes, problemet me lëkurën, reumatizmi, deformimet e gjymtyrëve, etj., janë vetëm disa nga sëmundjet që mund të gjejnë kurim në këto ujëra. Kjo qendër ka një staf shumë të përgatitur mjekësor të cilët ju shërbejnë pacientëve dhe vizitorëve me përkushtim.
Të pozicionuara midis dy shpateve malore plot gjelbërim, shërbimi i tyre plotësohet edhe me mundësitë shumë të mira që ofrojnë hotelet përbri tyre.
Ky është kulmi i sezonit të frekuentimit të llixhave, ndaj edhe unë i ftoj të gjithë turistët vendas dhe të huaj t’i shfrytëzojnë ato.
E bindur se do të gjeni shërbimin cilësor, duke nisur që nga mikpritja dibrane e deri tek profesionalizmi në trajtim, me ushqime organike vendase dhe çmime ekonomike të pakrahasueshme me asnjë vend tjetër.