Me pjesmarrjen e kufizuar të antarëve të Asambleve Socialiste të Bashkive Mat, Dibër, Bulqizë e Klos u prezantuan sot kandidatët e PS-së për Qarkun e Dibrës, Lavdrim Krashi, Aurora Mara, Dionis Imeraj, Melaim Damzi, Spartak Koltraga dhe Anisa Gjika.
Kryebashkiaku i Matit Agron Malaj nënvizoi gjatë takimit të zhvilluar në Burrel se këtë herë dibranët, matjanët e buqizakët duhet të mbështesin masivisht kryeministrin Edi Rama dhe Partinë Socialiste.
“Ndërtimi i Rrugës së Arbërit si dhe investimet serioze në ujësjellësa, rrugë, sheshe, kanale ujitës, shkolla, kopshte, çerdhe, lulishte, mjedise sportive, etj, kërkojnë që mbështetja për qeverinë të jetë maksimale. Banorët e këtyre trevave ia kanë borxh Edi Ramës votën me 25 prill 2021”, nënvizoi Malaj.
Deputetja Autora Mara, theksoi se kandidatët e Qarkut të Dibrës janë përzgjedhur me kujdes, ato vijnë nga radhët e komunitetit dhe u kanë shërbyer ndër vite qytetarëve të Qarkut Dibër.
Mara shtoi se: “E gjithë Shqipëria është kthyer në kantier ndërtimi. Po ashtu i gjithë rajoni është kthyer në kantier ndërtimi. Investimet e nisura duhet të vijojnë dhe të tjera do të nisin me siguri. Rëmdom dëgjojmë opozitarët se kjo mazhorancë është konsumuar dhe se kërkohet rotacion politik. Këto janë mashtrime. Mazhoranca socialiste nuk është konsumuar aspak. Ajo ka faktuar se ka ndërtuar vepra të mëdha dhe jep garanci për investime të tjera kolosale. Gjatë kësaj fushate ne kemi mundësi të përmendim arritjet e mëdha dhe të marrim angazhime të reja.”