Mediat kanë zbardhur detaje të reja rreth rastit të pengmarrjes në mes të ditës që shtangu Kamzën dy ditë më parë. Mësohet se i rrëmbyeri Jak Prenga, përveç identetit të dytë që kishte marrë, nën emrin Jurgen, njihej nga banorët e zonës dhe si “Doda”. Një nga pistat ku po hetohet është edhe mos shlyerja e borxheve nga ana e pengut. Burime nga grupi hetimor bëjnë me dije për Dosja.al se Prenga kishte blerë një automjet dhe një pjesë të parave nuk ua kishte dhënë ende pronarëve të automjetit.
Gjithsesi, ditën e sotme mediat ishin pranë familjes së Prengës, e cila nuk ka pranuar të flasë. Në lagje dhe në banorët përreth mbizotëronte heshtja, ndërsa Maria, gruaja e Prengës ka dalë të qetësojë gazetarët.
“Ju e keni bërë punë tuaj. Nuk del më keq se çfarë është bërë më. Mos u bëni merak? Çdo gjë është e pastër? Ju përshëndes,”– shprehet bashkëshortja e tij duke mos dashur të japë më tepër detaje. Sipas të njëjtave burime, mësohet se ky mesazh në gjuhën e rrëmbimit quhet “Kodi i Heshtjes”. Me heshtjen, nënkuptohet se palët janë duke u darkordësuar, për të arritur një marrëveshje larg syrit të autoriteteve ligjore apo edhe interesit të medias.
Policia ndërkohë ka gjetur një mjet të djegur në Shkallnur të Durrësit. Automjeti i llojit “Range Rover” me ngjyrë të bardhë dyshohet se është i njëjti që përdorën autorët për të rrëmbyer 49-vjeçarin. Jak Prenga u rrëmbye dy ditë më parë në Kamëz nga persona të maskuar. Autorët e morën me forcë dhe u larguan në drejtim të paditur me një “Range Rover” të bardhë. Ngjarja ndodhi në rrugën “Londër” në Kamëz, shumë pranë komisariatit të policisë. Ende asnjë gjurmë nga pengu.