Partia Demokratike Dega Dibër, ka paditur sot në SPAK dhe KLSH kreun e kësaj bashkie, Dionis Imeraj, të cilin e akuzojnë për shpërdorim detyre dhe shkelje të barazisë në tendera. Padia ka ardhur në lidhje me zhvillimin e tenderit me objekt “Ndërtim i Linjës së Furnizimit me ujë të pijshëm Gurra e Epërme-Luzni-Peshkopi”.
PD Dibër shprehet se nuk është kundër investimeve, por duke parë situatën e rëndë ekonomike, shkaktuar nga pandemia Covid 19, prioritet i prioriteteve do të ishte ndihma, përkrahja, mbështetja për familjet në nevoje, bizneset, fermeret, blegtorët etj.
“Autoritetet kontraktore duhet të vijojnë proçesin e prokurimit vetëm për ato proçedura prokurimi që lidhen ngushtësisht me mbulimin e nevojave të dala në kuadër të situatës së shkaktuar nga pandemia Covid 19 dhe që konsiderohen të domosdoshme”, thuhet në deklaratën e degës lokale të PD Dibër.
Sakaq kryetari i Bashkisë Dibër në përgjigje të akuzave të PD-së shprehet se demokratët: “Sot, të sapo dalë nga vetizolimi po flasin përçart. Përmes një deklarate për mediat, u kujtuan për situatën dhe komunitetin. Fakti që Bashkia Dibër ka menaxhuar në mënyrën më të mirë të mundshme situatën aktuale dhe i është gjendur pranë çdo qytetari në nevojë e do të vazhdojmë ta bëjmë, nuk përtypet dot nga opozita. Investimet e tilla jetike, të rëndësishme në shërbim të komunitetit si furnizimi me ujë të pijshëm, plotësisht konform ligjit dhe rregullave të Prokurimit Publik, përfaqësuesit e Partisë Demokratike në Dibër nuk i kuptojnë sepse ata janë mësuar vetëm me shpifje, zhvatje dhe grabitje në kurriz të qytetarëve dibranë. Nëse nuk dinë të lexojnë, po i udhëzojmë ta bëjnë.”
Imeraj argumenton se nuk ka asnjë shkelje ligjore dhe se qytetarët nuk mund të lihen pa shërbime: “Në faqen e Agjencisë së Prokurimit Publik (APP), është mëse i qartë sqarimi për njoftimin me nr.2372 prot, datë 31.03.2020 ku citohet se “…autoritetet kontraktore mund të vijojnë proçesin e prokurimit (shpalljet e reja apo proçedurat që janë në proçes) për mbulimin e nevojave të dala në kuadër të situatës së shkaktuar nga pandemia Covid-19, dhe për ato objekte që janë të domosdoshme për mbarëvajtjen e punës së autoriteteve kontraktore, duke përfshirë objektet të prokurimit të lidhura me ofrimin e shërbimeve për komunitetin.” Jemi bashkëpunues për hetim nga organet kompetente për investimin në fjalë. Ndërkohë, shpifësit do të paditen për përpjektjet e tyre për të dëmtuar imazhin tim dhe të Bashkisë Dibër, në mënyrë që tjetër herë të mbajnë përgjegjësi për çfarë flasin.”