Sefedin Lleshi, 63 vjeç, banor i fshatit Rreth Kale, njësia administrative Muhur në Bashkinë e Dibrës prej datës 4 maj 2020 rezulton i humbur. Banorë të zonës shprehen se Lleshi kishte vajtur në fshatin fqinj, tek miqtë e tij dhe kur është kthyer dyshohet se teksa kalonte me kalë lumin Drini i Zi mund të jetë mbytur.
“Kali me të cilin udhëtonte Sefedini është kthyer në banesën e Lleshit, i gjakosur dhe i dërmuar, ndërkohë që fati i kryefamiljarit nuk dihet. Dyshohet se thellësia e lumit ka bërë që 63 vjeçari të mbytet ndërkohë që kali ka arritur t’i përballojë dallgët e mëdha të lumit”, thanë banorë të fshatit Rreth Kale.
Mësohet se banorët e zonës dhe kafshët e ngarkesës kalonin zakonisht në një urë pasarelë që lidhte dy brigjet e lumit Drin. Sakaq kali që posedonte Sefedin Lleshi nuk kalonte mbi urë vetëm në rrjedhën e lumit. Me sa duket prurjet e datës 4 maj në lum kanë qenë të mëdha.
Familjarët kanë kërkuar ndihmën e Policisë dhe strukturave të tjera shtetërore për gjetjen e Lleshit. Banorë të zonës dhe efektivë të Policisë Dibër kanë nisur kërkimet përgjatë lumit Drini i Zi, por terreni i thyer nuk lejon kqyrjen e gjithë territorit. Familjarët kërkojnë ndihmën e pëlumbarëve dhe forcave të ushtrisë për të mundësuar gjetjen e të zhdukurit. /tirananews.al/