Dibra dhe Gjirokastra janë dy qarqet e vetme që në zgjedhjet e 25 prillit do të zgjedhin nga një deputet më pak se në zgjedhjet e herëve të kaluara. Drejtoria e Gjendjes Civile ka informuar zyrtarisht KQZ-në për tkurrjen e numrit të popullsisë në këto qarqe, si pasojë e largimit të qytetarëve, kryesisht drejt Tiranës.
Nga formula e përllogaritur nga Komisioni Qendror i Zgjedhjeve, si në Dibër, ashtu edhe në Gjirokastër, do të zbritet nga një mandat. Pra, dibranët do të zgjedhin 5 dhe jo më 6 deputetë, ndërsa gjirokastritët, do të votojnë për 4, e jo më për 5 deputetë.
Në këtë projektvendim të KQZ-së, të dy këto mandate që bien për shkak të lëvizjes së popullsisë, i shtohen qarkut Tiranë. Banorët e kryeqytetit do të zgjedhin tashmë jo 34, por 36 deputetë.
Referuar trendit të votave sipas rezultateve të 2017-ës, mandati i djegur në Dibër i ikën Partisë Demokratike, ndërsa ai në Gjirokastër i rrëzohet Partisë Socialiste.
Në Tiranë, sipas parashikimeve, dy mandatet e shtuara ndahen në mënyrë të barabartë, një PD e një PS.
Por lëvizjet e popullsisë dhe ndryshimet në gjendjen civile janë parë me dyshim në Komisionin Rregullator. Muharrem Çakaj kërkon llogaridhënie nga Ministria e Brendshme.
“A impakton kjo në ditën e votimit një zgjedhës që figuron i regjistruar në Tiranë por nuk shkon dot në qendër votimi, pasi i duhet të marrë letër njoftimin në Tropojë, Lushnje apo ku e ka. Në një mbledhje sa më të afërt të kishim prezent personin e nivelit drejtues të gjendjes civile që të na orientojë drejt një fakti të tillë”, – është shprehur ai.
Regjistri përfundimtar i zgjedhësve pritet të botohet në mes të muajit mars.