Analisti Lorenc Vangjeli ka pyetur ish-kryeministrin Berisha, lidhur me një takim të vitit 2018, mes tij dhe përfaqësuesit të Departamentit Amerikan të Shtetit, Jonathan Moore.
Më tej, referuar këtij takimi, Vangjeli tha se në konfidencë kishte mësuar që diplomati amerikan i kishte kërkuar Berishës të ndikonte në ndryshimin e lidershipit të PD-së, pas situatës së krijuar me publikimin e artikullit në revistën “Mother Jones”. Vangjeli pohoi se Berishës iu kërkua të mbështeste vendosjen e Rudina Hajdarit në krye të PD-së, por ish-kryeministri Berisha nuk dha emër, por theksoi se Moore i kishte kërkuar të mbështeste politikisht një person brenda PD-së gjatë një bisede konfidenciale.
Berisha: Unë mendoj se nuk duhet të bëj publike një bisedë konfidenciale. Ka pasur shqiptarë, por edhe vetë zonja Kim u ka thënë të tjerëve që ne e kemi paralajmëruar Berishën dhe një nga emrat është ky emër.
Fevziu: Çfarë ju ka kërkuar Moore, për ta bërë kryetar partie?
Berisha: Më kërkoi të mbështes politikisht një person, brenda PD-së dhe jo jashtë PD-së sepse ai e dinte që kundër Ramës punoja nga mëngjesi deri në darkë. Ai erdhi në një aktivitet të OKB-së dhe mbulonte organizatat ndërkombëtare në Departamentin e Shtetit. Është një bisedë konfidenciale.
Vangjeli: Erdhi nga SHBA t’ju kërkonte?
Berisha: Jo, ai erdhi për një aktivitet, mbulonte organizatat ndërkombëtare në DASH.
Fevziu: Kush ishte personi?
Vangjeli: Po them të vetmin emër, që nuk e ka thënë Moore, por e keni thënë ju në mënyrë konfidenciale dhe në mënyrë konfidenciale e kam marr dhe unë, është zonja Rudina Hajdari. Kjo ka ndodhur në 2018.
Në takimin e fundit ju është prezantuar pikërisht ky faul i zotit Basha me financimet e mundshme ruse, kur Nik Muzin deklaroi që kishte dhe një dërgesë tjetër prej 500 mijë dollarësh. Historia vazhdon, sepse përmendet edhe emri i një turku dhe në atë kohë ju është kërkuar të ndryshoni lidershipin e PD dhe kandidatura ka qenë Rudina Hajdari, e keni kundërshtuar. Kjo ka qenë besëlidhja e juaj e parë me Lulzim Bashën.