Reperi i njohur, Chucky Trill, është qëlluar për vdekje nga një person i paidentifikuar. Corey Detiege, i njohur si Chucky Trill, 30-vjeç ndërroi jetë në një spital në Atlanta në orët e para të mëngjesit të së premtes.
Mediat e huaja shkruajnë se reperi ka qenë duke udhëtuar në Georgia, teksa një makinë ka ndaluar afër tij dhe ka hapur zjarr në orën 3 të mëngjesit. Menaxheri i Chucky Trill ka konfirmuar se i ndjeri do të merrte pjesë në një event virtual në Atlanta.
Ndërkohë policia ka thënë se vrasësi është larguar sapo ka qëlluar drejt reperit dhe ende nuk është identifikuar. Gjithashtu policia nuk e ka përjashtuar faktin që Chucky Trill mund të jetë qëlluar padashje nga një makinë në lëvizje.
“Nëse qëllon nga një makinë në lëvizje dhe ka makina të tjera në lëvijze rreth teje, ti mund të qëllohesh”, ka thënë dikush nga radhët e policisë.
Chucky thuhet se është qëlluar me të paktën një plumb dhe ndërroi jetë në spital për shkak të plagëve të marra. Deri më tani nuk është arrestuar asnjë person për këtë ngjarje. Pasi lajmi u bë publik, menjëherë reaguan miq të reperit të cilët u shprehën të shokuar për vrasjen e tij.