Politikanët dhe krerët e shteteve nga Ballkani Perëndimor menjëherë uruan Donald Trump për fitoren në zgjedhjet presidenciale.
Presidenti Bajram Begaj ka uruar Donald Trump për fitoren përmes një postimi në platformën ‘X’. Presidentja e Kosovës, Vjosa Osmani e uroi republikanin Donald Trump për fitoren e shpallur në garën presidenciale kundër demokrates Kamala Harris në SHBA. “Pres me padurim të punoj me administratën e re, për të thelluar më tej lidhjen tonë unike dhe aleancën strategjike”, shkroi presidentja Osmani në X.
Presidenti i Serbisë, Aleksandar Vuçiç, ka uruar republikanin Trump: “Urime Donald Trump për fitoren tuaj. Së bashku, përballemi me sfidat serioze që kemi përpara. Serbia është e angazhuar të punojë me SHBA-në për stabilitet, rritje dhe paqe”.
Fitoren e Trumpit e mirëpriti edhe Presidenti prorus i Republikës Srpska në Bosnje e Hercegovinë, Millorad Dodik, i cili është në listën e zezë të SHBA-së. Republikanin e kanë uruar për fitoren e pretenduar edhe liderët e tjerë të vendeve të Ballkanit perëndimor, si kryeministri i Maqedonisë së Veriut, Hristijan Mickoski, Presidenti i Malit të Zi, Jakov Millatoviç dhe Kryetari i Presidencës së Bosnjë dhe Hercegovinës, Denis Beqiroviç.