Drejtori Vendor i Policisë Dibër Drejtues Skënder Hita pati sot në një takim miqësor me gazetarët që operojnë në qarkun e Dibrës.
Drejtori i Policisë u ofroi të gjithë mbështetjen e tij dhe njëkohësisht bëri një përshkrim të përgjithshëm të punës së Policisë, kjo në kuadër të bashkëpunimit dhe transparencës me media.
Drejtor Hita gjatë takimit u shpreh se Policia e Dibrës është e gatshme që të bashkëpunojë ngushtë me gazetarët dhe mediat lokale, në çfarëdo lloj fushe e cila ka për qëllim përmirësimin e bashkëpunimit të ndërsjellë në interes të informimit të publikut, bashkëpunim ky i cili ndodh çdo ditë nëpërmjet zyrës së komunikimit me median dhe publikun në DVP Dibër.
Gjatë takimit, u dakordësua se bashkëpunimi Polici-Media do të përforcohet duke u pasuar dhe me takime të tjera të cilat do të ndikonin pozitivisht në të gjitha aspektet e bashkëpunimit të transparencës me mediat dhe publikun.