Analisti Alban Dudushi, i ftuar në emisionin “Open” ka komentuar përplasjet e fundit virtuale mes kryeministrit Edi Rama dhe Lulzim Bashës.
Sipas Dudushit, Basha përdor ironinë si një mënyrë për të tërhequr vëmendjen, ndryshe nga qasja e ish-presidentit Ilir Meta, i cili synonte përballjen e drejtpërdrejtë me kundërshtarët.
“Basha, ndryshe nga Meta që thoshte se do thyente në mes më të fortin, e gudulis atë. Në këtë mënyrë, ai tërheq vëmendjen tek vetja,” – u shpreh Dudushi.
Nga ana tjetër, ai tha se Rama përdor ironinë për të sulmuar dy figurat kryesore të opozitës, duke përshkruar Berishën si një figurë të vjetër që nuk largohet dhe Bashën si një politikan pa mprehtësi dhe energji.
“Rama e stigmatizon Berishën si ‘bufi i kënetës’ që nuk ikën, ndërsa Bashën e etiketoi si të përgjumur dhe pa mprehtësi. Nuk besoj se ky do jetë thelbi i fushatës, por është një strategji që ngjit te publiku i ri,” – analizoi ai.