Kur kanë kaluar plot dy ditë nga humbja e shtetasit Tofik Xhika, 49 vjeç me banim në Dibër, ende nuk ka asnjë shenjë për gjetjen e tij.
Së fundmi, ekipeve të kërkimit u janë bashkuar edhe një grup polumbarësh nga Tirana.
49-vjeçari u raportua i zhdukur në polici nga familjarët e tij, të cilët kishin humbur kontaktet me të.
Për herë të fundit ai ishte parë në fshatin Fushë-Alije, duke peshkuar në bregun e lumit Drin i Zi. Makinën e tij, Xhika e kishte parkuar në afërsi të lokalit të fshatit.
Banorët i janë bashkuar grupit të polumbarëve që po kryejnë kërkime në shtratin e lumit Drin, por deri tani pa rezultat.
Sipas dyshimeve, pista kryesore e zhdukjes së tij konsiderohet mbytja në lumë.