Dy vëllezër, efektivë policie, akuzohen se janë përfshirë në një konflikt të dhunshëm duke rrahur një qytetar në Burrel.
Agjencia e Mbikëqyrjes Policore raporton se ka ndaluar njërin prej tyre, efektivin Avni Uka, me detyrë Patrullë e Përgjithshme pranë Komisariatit të Policisë Dibër, i dyshuar për veprën penale “Shpërdorim i detyrës”.
Ndërkohë, vëllai tjetër, efektivi Sulltan Uka, me detyrë në Komisariatin e Policisë Mat, është proceduar në gjendje të lirë për veprat penale “Prishje e qetësisë publike” dhe “Vetëgjyqësia”.
“Nga veprimet e para hetimore të kryera nga AMP, janë krijuar dyshimet e arsyeshme të bazuar në prova e fakte, se dy punonjësit e policisë (vëllezër), janë përfshirë në një konflikt për motive të dobëta me shtetasin A. K., në qytetin e Burrelit, ku kanë tentuar të vetësqarojnë situatën duke përfunduar në veprime të dhunshme dhe të rrezikshme për shendetin e shtetasit”, thuhet në njoftimin e AMP-së.
Organet hetimore po vijojnë hetimet për të zbardhur plotësisht rrethanat e ngjarjes.