Një operacion që duhet të ishte një rutinë për stafin mjekësor, përfundoi tragjikisht 2 vjet më parë në një spital privat në Tiranë. Ngjarja ndodhi në maj 2017 kur 15-vjeçarja Blerta Pepa hyri në sallën e operacionit, pasi kishte dëmtuar meniskun e gjurit, por fatkeqësisht doli e vdekur prej andej. Adoleshentja ndërroi jetë dhe asokohe u tha se vdekja erdhi si pasojë e hipertermisë malinje.
Por tragjedia nuk përfundoi këtu. Mjeku anestezist Tefik Zhurda, i mbetur i vetëm përballë presionit te të afërmve të vajzës të cilët të dëshpëruar kërkonin një fajtor për vdekjen e saj, tentoi të vrasë veten, duke injektuar në trup preparat lënde anestezie. Emisioni “Dritare me Rudinën” në News24 i cili ka trajtuar mbrëmjen e së martës ka risjellë në kujtesë ngjarjen e trishtë duke zbuluar informacione për gjendjen e mjekut Zhurda.
Anestezisti i njohur nuk vdiq, por që prej natës së 16 majit, thuajse nuk është më në jetë. Ai u dërgua edhe në një spital në Peruxhia por as mjekët italianë nuk e shpëtuan dot. Po mbushen dy vjet që anestezisti I njohur gjendet në një situatë neurovegjetative, e thënë ndryshe paaftësi për të jetuar. Në kokë i rri bashkëshortja e cila ka lënë çdo angazhim tjetër për të qëndruar pranë njeriut të saj më të afërt.
Tentativa për vetëvrasje e mjekut anestezist Tefik Zhurda, preku thellë kolegët. Apostol Vaso, mjek anestezist pranë spitalit të Traumës, reagoi përmes një statusi në Facebook, ku gjeti mbështetjen e bluzave të bardha. Teksa shprehte solidaritetin me kolegun, ai shkruante se në një trysni të tillë, nga humbja e një jete por edhe nga paragjykimi i shoqërisë dhe i medias, do të bënte të njëjtin veprim.